Legg til hele avisrapporten i min rapport

Sunnmøringen

Sunnmøringen er å finne på pc, nettbrett og mobil heile veka, og kjem ut i papirversjon onsdagar og laurdagar. Avisa blei etablert i 1946, og dekker først og fremst Geiranger, Hellesylt/Sunnylven, Liabygda og Stranda. Også i 2014 publiserte Sunnmøringen viktige lokaljournalistiske saker på ulike samfunnsområde. Hovudsakleg gjennom tekst og bilete, men også via nokre få videoinnslag.

Gå til sunnmoringen.no

Fakta

Samlet opplag 1822

Utgiversted Stranda

Ansvarlig redaktør Bjørn Arild Hatlem (53)

Kommer ut Onsdag og laurdag

Daglige lesere totalt

4750

Daglige brukere på nett

1075

Daglige brukere på mobil

434

Fordeling lesere

Antall sider produsert

1544

Redaksjonelle årsverk

Fordeling stoff/annonser

Antall lederartikler

Antall kommentarer

Antall innlegg på nett

Refuserte innlegg på nett

Antall leserinnlegg

Mål og prioriteringar

Stranda er ein kommune der det stadig skjer interessante ting innanfor politikk, kultur, turisme og næringsliv generelt. Ein redaksjon samansett av to journalistar og ein redaktør/dagleg leiar gjer sitt beste for å spegle det som skjer med artiklar og bilete på nett dagleg og i papiravisa to gonger i veka.

Skal ein få oversyn og følgje med på hendingar i dei ulike bygdelaga, må ein følgje med i lokalavisa Sunnmøringen.

Avisa har som mål å både dra fram eldsjeler og positive tiltak, og rette eit kritisk søkjelys på forhold i politikk og samfunnsliv som ikkje er slik det bør vere.

Sunnmøringen skal vere først og best på det som skjer i Stranda, eller har nær tilknyting til kommunen. Både folkeopplysning og underhaldning er viktige ingrediensar i det vi byr på.

Samfunnsrolla

Redaksjonen har i mange år hatt direkte videooverføring frå ordskifta i kommunestyremøta, noko som kan vere både informativt og underhaldande. I 2014 starta så vidt med å lage og publisere korte videosnuttar frå ulike hendingar.

Også i 2014 var det naturleg for avisa å skrive mykje om økonomien til Robek-kommunen Stranda. Langtidsgjelda er i norgestoppen, men dyktige etatsleiarar og tett oppfølging frå administrasjonen sentralt gjer at drifta er under langt betre kontroll enn i mange andre kommunar.

Men det er ikkje alt som fungerer så bra som det burde. Vi har blant anna tatt for oss habilitetsproblem, ulovleg lukking av møte og andre moglege brot på lover for kommunal styring og forvaltning.

Nokre av dei store sakene som har vore mykje omtala er Stabburet, Orkla Foods Norge si avdeling på Stranda. Ei av dei første utgåvene av avisa i 2014 omtala vi at Orkla sentralt hadde gitt klarsignal for å byggje nytt pizzafryseri på Stranda til fleire titals millionar kroner. Sjølv om alle var for dette lokalt, gjekk det i lang tid ein strid om kvadratmeterpris og mogleg oreigning av tomt til pizzafryseriet.

Litt seinare på året, etter månader med spenning, kom endeleg stadfestinga av at Orkla ville flytte lefseproduksjonen frå Lierne bakeri i Trøndelag til Stabburet på Stranda. Konsernet investerer totalt bortimot 200 millionar i anlegget der, noko som får ringverknader i ein kommune på 4.600 innbyggarar.

Av andre positive forhold kan det nemnast møbel- og interiørverksemda Slettvoll som går mot straumen med vekst og overtidsjobbing for å kunne produsere nok.

Beste nettsaker i 2014 (krimsaker unntatt)

Såg ulv på Hellesylt

Ynskjer å hjelpe andre

Jaktar ulv i Strandadalen

Lied fråtrer som rådmann

Møbelfirma går mot straumen

Sjå bilete frå «Bølgen»

Huset er så spesielt at det ikkje kunne rivast

Slik blir det nye Strandafjellet:

Krev innsyn i løna til alle kommunetilsette

Overvakinga av Åkneset er utsett for hærverk

Journalistfagleg utvikling

Sunnmøringen dreg nytte av kompetansehevande kurs som særleg Polaris Media Nordvest arrangerer. Eitt av dei i 2014 var kurset mobil reporter. Utskiftingar i staben gjer det nødvendig med nye kurs innan ulike tema. Endringar i mannskapet har også vore medverkande til at avisa ikkje har kome så langt som ønskjeleg når det gjeld å bli meir digital både redaksjonelt og marknadsmessig.

Avisa har normalt eit lågt opplag, men Sommarmagasinet og Vintermagasinet har hatt blitt trykt i opp mot 33.000 eksemplar.

Prisar

I rapportåret mottok Sunnmøringen ingen prisar.

Etikk

I 2014 har det ikkje vore nokon som har meldt avisa til PFU. Men det er stadig etiske vurderingar som må gjerast. Nokre er lette å ta, andre vanskelegare. Kva kan ei avis for ein liten kommune skrive utan å kome i skade for å identifisere når det gjeld skuldingar om familievald, eller om økonomisk press ved hjelp av torpedo og skitne triks? Og korleis skal ein handtere dei som prøver å leggje eit utilbørleg press på avisa gjennom trugsmål eller smisk?

Sunnmøringen skal vere uavhengig press, anten det er frå politikarar, næringsliv – eller frå organisasjonar og utdanningsinstitusjonar. Derfor avviste vi også kontant ein lærar sitt sterke ønskje om å få fjerna eit intervju med representantar for ei tilrettelagt bedrift. Læraren ville ha sletta omtale av ein «konkurrent» som han meinte hadde «tatt» ideen som klassen hadde til å skaffe pengar til skuletur. Då avisa nekta å bøye seg, gjekk vedkomande i staden på bedrifta og ba dei trekke intervjuet – eller gje skulen fortrinnsrett til produksjonen.

Dårleg: Fylkesveg 60 er svingete, holete og humpete - og går tett innpå hus og driftsbygningar på fylkesgrensa til Grodås i Hornindal. Både næringsliv og politikarar i Stranda og Hornindal krev at vegen blir utbetra. Foto: Bjørn Arild Hatlem

Svemorka: Orkla Foods Norge satsar opp mot 200 millionar kroner på pizzafryseri og lefsebakeri på Stranda. Fabrikksjef Hans Jostein Langelo, logistikksjef Einar Arve Nordang og entreprenør Kjetil Nordang er letta over at oreigningssaka blei avlyst og at kommunen kom til semje med grunneigarar om pizzatomta. Foto: Bjørn Arild Hatlem

Motstraums: Medan møbelbransjen slit med negative tal og dårleg inntening, har Slettvoll 13,5 prosents vekst hittil i år. Knut Olav Brendemoen, Vladimir Petrovic og hovudtillitsvald Harry Malmo fortel om ein arbeidsgjeng som står på for fullt for å ferdigstille ordrane før jul. Overtid og laurdagsjobbing er ikkje norma i møbelbransjen i desse dagar, men Stranda-firmaet gjer det godt i marknaden – noko dei har gjort over fleire år. Foto: Renate Furre Henriksen-Sandvær.

Lån: Stranda reduserer gjelda med nesten 80 millionar kroner i år. Noko økonomisjef Ståle Anker Ljøen er glad for. Han har Stål(e)kontroll på økonomien og følgjer einingane tett. Stranda ligg an til eit mindreforbruk på 6,1 millionar i 2014 i høve til budsjettet. Foto: Bjørn Arild Hatlem

Ulv: Sunnmøringen fortalde 22. mai at Jan Pedersen hadde observert ulv i Sunnylven, og snart kom meldingar om ulvedrepne sauer. Dette starta eit svært stort engasjement både lokalt og på landsplan for og imot ulven som blei jakta på i både Stranda og Sykkylven kommune før han enda livet sitt sistnemnde stad. Sunnmøringen skreiv fleire saker både i papiravisa og i nettavisa, og to av desse kom også heilt på topp i statistikken for beste nettsaker. Foto: Tor Arne Tryggestad.

Grøn Fjord-konferanse. Bildetekst: Jubla for Grøn Fjord. 160 deltakarar diskuterte miljø, teknologiske nyvinningar og berekraft på den første Grøn Fjord-konferansen som har blitt arrangert. Dette skjedde i Geiranger i januar. Foto: Vidar Eliassen.

Miljøkongar: Fylkesmann Lodve Solholm, strandaordførar Jan Ove Tryggestad og Bjørn Bjerke frå Miljøverndepartementet vart kåra til «miljøkongar» av ungane i barnehagen i Geiranger. Foto: Vidar Eliassen.