Fjuken er lokalavisa for kommunane Lom, Skjåk og Vågå, og har som hovudmål å vere limet og lupa i dei tre kommunane. Fjuken skal spegle lokalsamfunna på godt og mindre godt. Vi skal skrive om det som opptek lesaren vår, vi skal vere kritiske når det er naudsynt, men framfor alt syne fram alt det positive som skjer i bygdene. Vi skal syne fram kulturlivet, det frviljuge organisasjonsarbeidet, vi skal ha ungdomsstoff som gjer at dei yngre lesarane våre finn Fjuken interessant og gjer dei samfunnsengasjerte, og vi skal vere ein arena for meiningsytringar, både på redaksjonell plass og i lesarbrevspaltene.
I 2014 har Fjuken i tillegg til papiravis, laga nettavis. Den oppdaterar vi ofte, og får på den måten ut dei raske nyheitene. Denne sida er også linka opp mot ein facebookprofil for Fjuken, og her er det stort engasjement kring dei sakene som Fjuken skriv om. Vi har også annonser på nett. Rett nok ikkje i stort omfang enno, men vi satsar på at dette vil endre seg i tida framover.
Saker som har vore på nettsida vår lagar vi mindre eller med ein annan vri, i papiravisa. I tillegg til Fjuken sender vi også ut tre magasin i året; vinter, sommar og haust. Desse går til samtlege husstandar i kommunene Vågå, Lom og Skjåk, i tillegg til alle hytteeigarar i området. Dette er redaksjonelt gode magasin i kombinasjon med lokale annonser. Juleavisa vår i 2014 var på 72 sider, påskeavisa på 80 sider.
Året 2014 har vore eit jubileumsår for Fjuken. Det er 25 år sidan fyrste avisa kom ut, og dette feira vi med alle tilsette, deira ektefeller/sambuarar og med eigarane våre i Ålesund. Ei flott og sosial helg med omvising på trykkeriet i Breivika, samt lunsj i lokala til Sunnmørsposten.
Fjuken fekk tildelt Austmannaprisen for 2014 for godt nynorsk språk. Det sette vi stor pris på.
Elles har året 2014 vore eit god økonomisk år for Fjuken, faktisk det nest beste i lokalavisa si historie. Vi har ei annonsesamkøyring (Dølasamkøyringa) med avisene Dølen på Vinstra, Vigga på Dombås og Norddalen på Sel. Denne kanaliserar bra med inntekter til alle fire avisene.