• Vi skal formidle det viktigaste som skjer i det offentlege rom, pluss at vi skal la folk som har meiningar om samfunnsutvikling få sleppe til. Vi skal skape engasjement og begeistring, og formidle ein levande debatt om korleis våre lokalsamfunn skal vere og utvikle seg.
• Endringar i næringsstruktur og næringsliv i regionen har vore viktige saker også i 2014. Mange bedrifter er inne i omstillingsfasar, og det har ført til mange nye bedrifter samstundes som tradisjonelle bedrifter har blitt lagt ned. Mange kommunar slit med dårleg kommuneøkonomi på grunn av auka kostnader, og auka krav til kvalitet på offentlege tenester og offentlege tilbod. Det har ført til stort folkeleg engasjement og debatt i spaltene både på nett og print om kva tilbod kommunane skal levere. Det har vore spesielt mange saker og debattar rundt skulestruktur og kvalitet i skulen.
• Organisering av helsevesenet i samband med nedbygging av Nordfjord sjukehus har også dette året vore sentral. Det same har debatten rundt kvaliteten på alle typar helsetenester vore. Mellom anna har det vore debatt rundt organisering av ambulansestasjonering og organisering av lokale legevaktordingar.
• Nedlegging av tollkontor, stasjonering av redningsskøyta, om den skal ha base i Måløy eller Florø, endring av politidistrikt og lensmannskontor har vore mykje omtalt både på nett og papir.
• Samferdsle med trygge og gode vegar, og gode offentlige kommunikasjonar både på sjø og land har også vore sentrale tema. Debatt rundt bygging av verdas første skipstunnel, Stad skipstunnel, har også i dette året skapt mykje engasjement. På hausten så arrangerte styret i Stad Skipstunnel ein to-dagars konferanse på hurtigruta. Det har også vore debatt om behovet for ny og større ferje og fleire avgangar på ferjesambandet som i 2014 hadde størst vekst i Sogn og Fjordane, sambandet mellom Måløy og Oldeide
• Det har også vore mykje debatt om kvar stamvegen nord-sør, E 39, skal gå – skal den gå i indre eller midtre Nordfjord. I 2014 bestemte samferdsledepartementet at brukryssinga skal kome i indre i Stryn kommune. I vårt område har kystvegen og styrking av 45-minuttarsregionen vore viktige saker som også i 2014 har skapt stor debatt og engasjement.
• Det har også vore mykje debatt om ferjetilbod og bussruter. Det har kome ein ny bussoperatør, Firda Billag, som i 2014 overtok mange lokalruter for Nettbuss. Det førte til at Nettbuss som driv ekspressbussruter mellom Nordfjord og Oslo, tre daglege avgangar, vurderte å kutte Måløy som endestasjon, og la ruta stoppe i Eid. Men etter mykje fram og tilbake så valde dei å halde på fleire av avgangane til g frå Måløy. Det har og vore stor debatt og engasjement rundt sjukehusbussen som kvar dag køyrer mellom Nordfjord og sjukehuset i Førde.
• Striden om kvar den nye kraftlinja skal gå gjennom fylket har ført til stort engasjement også i 2014. Spesielt i Bremanger og i Ålfoten. Her har grunneigarane vore sterkt usamde, og det var to rettssaker som følgje av striden.
• Vi er tett på og dekker det meste som skjer av det rike kulturlivet, sport og idrett som er i regionen. Vi er på mange arrangement, og store deler av våre spaltar både på papir og nett er fylt med denne type saker. Mange barn og unge brukar mykje av fritida si på dette.
•  

Vi har hatt interne kurs. Vi evaluerer kontinuerleg vårt eige produkt, vinkling og val av kjelder. Vi har sterkt fokus på val og bruk av kjelder vi brukar og vinkel på sakene.

Vi har hatt stort fokus på at papir og nett skal bli ulike og unike, og at dei to plattformene kan utfylle kvarandre og ikkje konkurrere med kvarandre.

Etikk

Vi har stort fokus på å følgje Vær Varsam-plakaten. Vi har opna for debatt via Facebook på 70 prosent av sakene vi publiserer på nett og opplever at når ytraren er kjent så blir det stort sett ein ryddig og konstruktiv debatt. Kommentarane er stort sett saklege og ryddige.

I 2014 var vi ikkje klaga inn for Pressens faglege Utval (PFU).

Erling Wåge

Ansvarleg redaktør